2010 Dreams

أحلام 2010

بحلم و حلمى بسيط الشكل
لكن حصوله دا شىء مش سهل
محتاج حاجات و تضحيات
مش بس حكمه و حبة عقل

بحلم و حلمى دا مطلب عام
مش بس فكره و كتر كلام
عشان نعيش و ما ننتهيش
لازم عالمنا يعيش ف سلام

بحلم و حلمى عن الحريه
لكل الناس مش بس ليا
مشوار طويل و مش مستحيل
همشيه عشان أجمل هديه

بحلم و حلمى عشان يتحقق
محتاج ثبات على أصعب مبدأ
مبدأ قديم لكن سليم
لو يوم حصل ...تفتكرو هصدق؟

موسم الأجازه

خلص موسم الأجازه
و فات كأنه ثانيه
لو عايز يوم أجازه
إحسبها حسبه تانيه

سنويه من حسابك
مرضيه إيه إللى جابك
عارضه تلاقى جنابك
محتاج تنام شويه

متأخر يوم عشان
مشوار و مهما كان
لساك برضه ف أمان
إذن بكل القضيه

أربع مرات أذونات
شالك يوم م الأجازات
لو عندك إمتحانات
يبقالك يوم هديه

قوانينها كتير و لكن
هواها ف قلبى ساكن
أجمل كل الأماكن
مكتبة إسكندريه

An Important Visit

تعليمات

روحت الشغل أنا النهارده
كان فى زياره بس جامده
م إللى تظهر أى معدن
قبل ما تخش المكان ده

و عدى نهارى بشكل عادى
و الجو كان لذيذ و هادى
و قلت زى كل يوم
أخدلى "بريك" أنا الساعادى

و نزلت عادى ف "البريك"
شربت "ببس" و كلت "كيك"
و خلاص شبعت و لسه طالع
قالولى إيه إللى ف إيديك

فجأه طلعت تعليمات
ممنوع دخول التليفونات
و سألت نفسى و قلت ليه
خايفيين أكيد م الإشعاعات

أروح أديه لمين يا بيه
شاورلى بعيد كده بإيديه
و قالى تروح هناك شويه
تديها للى إسمه إيه

لقيت كمال واقف قصادى
و قالى هاته هشيله عادى
و من ساعتها طلعت فوق
و قفلت كلام أنا ف السيرادى

سبوبة الأغانى الوطنيه

مصر فى السودان

يحكى أن و كان ما كان
ماتش مصر فى السودان
إتغلبنا و إضربنا
و كله نايم ع الودان

ماتش بعده علقه سخنه
و بعد الضرب بجد دخنا
بس واصل م إللى حاصل
إن إحنا بجد فوقنا

ع الحقيقه إللى كانت
غايبه عنا و لينا بانت
وإن هيه القضيه
روح بلادنا فينا قامت

و الحقيقه إن الهزيمه
ردت فينا روح قديمه
عينا منها و محتاجينها
عشان بلادنا تكون عظيمه

A reply to Mariam

بعتذرلك

سنين عدت و أنا صغير و طفل رضيع
و عايش ويا أبويا و أمى و كنت وديع
ما كنتش أبدا أتخيل ف يوم إنى
هقولك لأ يا أبويا و ما كنش مطيع

سامحنى ما كنش يوم قصدى أهين أو أبيع
دانا عايش بدعوتك ليا و من غيرها أضيع
يا أجمل أب ف الدنيا يا شىء منى
يا مخلى راسنا مرفوعه و مقامنا رفيع

زعلك منى صدقنى بجد فظيع
و حبك ليا خلالى حياتى ربيع
يا رب تبارك لنا ف عمره علشانى
بدعيلك جوه من قلبى و ربى سميع

Congratulating Bassem el-Sayed on His New Born

أهلا

باعت أهنى بعضو جديد
خلى قدومه الكل سعيد
و مهما وصفت الفرحه أكيد
مش هتصدق مهما وصفت

فاتح قلبى و رافع كفى
بدعى يارب كلامى يكفى
وصف الفرحه و أقدر اوفى
سعاده كبيره ما زييها شفت

أهلا بيها و ألف ماشا الله
أجمل ورده و زهره و فله
نسمه جميله ف قلب الضله
و ربى يخلى أجمل بنت

For The Bulletin Board

مودك إيه؟؟؟؟

المود عالى و حلو و فوق
كل ما بزعل برجع أروق
أحب حياتى و أنسى آهاتى
أصلى ما حبش أعيش مخنوق

ويا البحر أنا بنسى همومى
و أعشق شمس نهارى و يومى
و هفضل عايش حر و طايش
مهما يا دنيا عليا تلومى

و كل منايا أعيش مبسوط
و أسهر أغنى بعلو الصوت
و أيوه أنا لاغى كل دماغى
و هفضل أحب الدنيا دى موت

Congratulating Prof. Noha Adly on Her Promotion to The Post of Professor

مبروك

سمعت الأخبار جتلك أهنى
بكلمه خفيفه سريعه لأنى
دايماً جد و سابق سنى
و لأنك فعلاً تستاهليها

الفرحه معاكى دى بتجمعنا
و ننسى معاكى كل أوجاعنا
و علشان يبقى لفرحنا معنى
قلنا هنفرح كلنا بيها

كلمة مبروك كلمه عاديه
كل الزملا قالوها قبليه
و أى تهانى عليكى شويه
لو جينا قارنا نجاحك بيها

pilgrimage

رايح الحج

أنا رايح الحج عشان
البى ندا الرحمن
رايح و أكيد طمعان
ف مغفره من عند الله

جبت الهدوم البيض
كله جديد ف جديد
مشتاق لسيره العيد
و لكونى ضيف الله

مشتاق لمنه و عرفات
و طواف و سبع أشواط
يا مكان مليان بركات
يا أول بيت لله

رايح أرجم بالجمرات
شياطين ابليس بالذات
و أتخلص م الشهوات
و جايلك يا رسول الله

و يا رب أنا يوم ما القاك
أمشى على كل خطاك
يا بشر و ف زى ملاك
يا حبيبى يا رسول الله

و يا رب ف يوم الدين
تكون لى خير معين
تشفعلى و أنا المسكين
و أنول مغفرة الله

أيام الجيش

هانسى خلاص أيام المر
أيوا يا دنيا أنا عايش حر
ويا صحابى ويا أحبابى
عايش دنيا جميله تسر

بح خلاص أيام الجيش
بعد ما كنت باعد أديش
فاضل منه فات و كأنه
شيله تقيله ف لفة خيش

أيوا يا فندم أيوا يا بيه
قولى الأمر و أنا أمشى عليه
جمله نسيتها خلاص و رميتها
و ما بقاش حد بيسأل ليه

خدت قرار أنا من دلوقتى
هاسهر ليلى و أصحى براحتى
هانسى الهم و مش هاهتم
و هابدأ أدور على مصلحتى

Ahmed Mounir, Malak Michel and Tarek el-Ganainy Had an Accident (2008)

إقرا الحادثه

تلاته أصدقاء
يتصفو بالذكاء
و بكل حاجه حلوه
و الإخلاص و الوفاء

ف ظل ظروف عويصه
و عك و خلطبيصه
ربك تملى يسطر
و ما يخلناش بسيسه

نتمنى ليكو السلامه
و تبعد عنكو الندامه
يالى انتو تملى ليكو
ف القلب ألف علامه

دعواتنا بالشفاء
ليكو من كل داء
و يارب نشوفكو دايما
ف عزه و كبرياء

Replying to Mohamed Yousri (tomatoes)

حمرا يا أوطه

واهى حمرا و زى التفاح
لو مره بشوفها أنا برتاح
دانا قلبى فى مساء و صباح
يبحث عنها ف كل مكان

واأهى حمرا و زى العناب
و توقع رجاله بشناب
و قالولى وصفها ف كتاب
بس عاوزها أنا زى زمان

واهى حمرا و زى البطيخ
و شفناها بطلنا صريخ
و كان نفسى أروح المريخ
بس و ماله أستنى كمان

واهى حمرا وما فى منها اتنين
بعشقها و عندى أنا شهرين
محروسه تملى من العين
ياطماطم يالى أنت جنان

2007

برنامج منوعات

معلش شوية تعديلات
لكن راجعين يوم التلات
إستنى و إوعى تروح ف حته
أحسن تفوتك قنبلات

جايبين معانا صوت جديد
و شوية هلس م الشديد
خليك معانا الساعه سته
هنقولك كيف تعيش سعيد

أخبار و موضة الأوان
و فن زى بتاع زمان
و تليفزيون ف أى حته
عشان نجيلك بالألوان

أحداث جديده و رأى عام
و الفرخه يجيلها إزاى زكام
و فرن العيش محتاج لجته
عشان يشارك ف الزحام

أخبار جديده عن الإضراب
و درس خصوصى ف الإغتصاب
و إزاى تشم م الباكته
و لكل جريمه تلاقى عقاب

معادنا معاك ف كل يوم
معانا تغسل الهموم
دعواتنا ليك ف كل شده
تشوف سعاده و خير يدوم

2006-2007

نظرة تفاؤل

بلادنا الجميله
بلادنا الأصيله
بلادنا النبيله
و ست البلاد

يا سامع كلامى
يا فاهم آلامى
يا رامى بسهامى
ف قلب العباد

بلاش تبقى جارح
و خليك مسامح
و حقك ده رايح
لو دست الزناد

نفكر بعقل
و نبدأ بسهل
و نبنى بمهل
ننول المراد

و شوف بص سينا
و طابا و مارينا
إيديكو ف إيدينا
نعمر بياد

و نبنى المساجد
لعابد و ساجد
و ننسى الشدايد
بقوه و عناد

و نفتح مدارس
و جامعه و كنايس
نجوز عرايس
و قولنا ده جاد

و نبنى المساكن
و نبنى المداين
و نروى الجناين
بدم الفؤاد

آهات

عد الآهات يا زمن

عدد و سمعنا
ده لكل جرح تمن
و لكل آه معنى

ياما عدت بينا المحن
و الجرح كان مفتوح
لا عمر ألمى سكن
ولا الوجع مسموح

سهران ف ليل الأمل
مستنى أخره نهار
لا عمر جرحى أندمل
ولا عمرى يوم أنهار

إلاهى

نفسى تنور ليا طريقى
نفسى تكون ف حياتى صديقى
نفسى أعيش على طول وياك
نفسى أحبك حب حقيقى

نفسى أكون وياك على طول
سهران ليلى و بيك مشغول
ليلى نهارى أتمنى رضاك
اسأل قلبى و هو يقول

و لما تضيق الدنيا عليا
بألقى هموم الدنيا شويه
علشان عايش و أنا وياك
ما أنت حبيبى و كل ما ليا

بأطلب منك لو تسامحنى
علشان قلبى نسيك و طاوعنى
حب الذات بينسى لقاك
و الشيطان على طول يخدعنى

اغفر ليا كل ذنوبى
طهر نفسى و قول لها توبى
ما أنت إله الكون و لولاك
تظهر للناس كل عيوبى

بحبك يا مصر

صورتها فخيالى
و دايما ف بالى
وهى إنشغالى
فتاة كل عصر

يا أحلى المعانى
يا ساكنه ف كيانى
يا كل الأمانى
يا غنوه يا قصر

و بأسمع كلامك
و أحس بألامك
وراضى بغرامك
و حاسس بنصر

و شىء مش بإيدى
أشوفك تزيدى
ف دمى و وريدى
و بحبك يا مصر

جندى

بحبك يا أمى بحبك أكيد
و حبك ف دمى و جوه الوريد
لا يمكن أبيعك أو أبعد بعيد
بحبك و هفضل ف حبك شهيد

بحبك و ماسك عشانك زناد
و جاهز تملى ف أرض المعاد
و مهما الاعادى تسوق ف العناد
هاضحى بروحى و أكون لك شهيد

بحبك يا أمى و مش مستحيل
نصلح و نبنى و نطلع بجيل
يحبك يصونك يكون لك دليل
يضمك ف حضنه يكون لك شهيد

بحبك و ياما سمعت الملام
و سادد ودانى وحابس كلام
فعشقك و حبك يا أجمل غرام
و هفضل أحبك يا أم الشهيد

did you know me!!? (On The Occasion of 6th of October)

‫عرفتينى!!؟‬

‫أنا عاشق ليالى الكون‬
‫و عاشق كل شىء مجنون‬
‫بنادى الفرحه وين ما تكون‬
‫بسيط جدا ف تكوينى‬

‫و حلمى الصديق ألقاه‬
‫و أفرح لما أكون وياه‬
‫و حابب كل خلق ال‬له
‫و كلمة حب تروينى‬

‫و تملى بعرف أعمل خير‬
‫و ساكن فيا حب الغير‬
‫و عايش حر زى الطير‬
‫و كلمة كدب تكوينى‬

‫و لو يوم كان زمانى يدور‬
‫و تبقى صعابى و سع بحور‬
‫هعدى ألف سور ورا سور‬
‫و كلمة صدق تحيينى‬

‫على حدودك بديت عصرى‬
‫و نسيت أحزانى يوم نصرى‬
‫يا مصر أنا ابنك المصرى‬
‫عرفتينى!!؟‬

Congratulating Nemo's Team

‫حلوه الصوره‬
‫شمس نهارنا بتيجي و تعدى‬
‫والايام بتفوت ما تهدى‬
‫حلمنا تملي باحلام وردى‬
‫علشان تطلع حلوه الصوره‬

‫عاملين شغل كبير و جديد‬
‫سهرو ليالي و تعبو أكيد‬
‫علشان يبقي بجد مفيد‬
‫و عشان تفضل حلوه الصوره‬

‫مهما عملنا شويه عليكو‬
‫و لو جبنالكو الكون يهاديكو‬
‫يسلمو لينا عنيكو و إيديكو‬
‫يالي نفوسكم مش مغروره‬

‫حلوه الصوره إللى رسمتوها‬
‫بفضل جهودكم نورتوها‬
‫يلا معانا تعالو شوفوها‬
‫دى كل الناس صبحت مسروره‬

Congratulating Dr. Noha on her promotion

‫مبروك‬
‫مليون مبروك و يا رب تملى تكونى سعيده‬
‫كل النجاحات دى عليكى مش حاجه جديده‬
‫سامعين أخبارك حاجه تشرف بره و جوه‬
‫يالى إنتى ف قسمنا حاجه نادره و فريده‬

‫كل الاقسام دى عليكى أكيد حاسدانا‬
‫باصين قدامنا و مش هيهمنا م أنت معانا‬
‫لمينا بعضنا إحنا و هما و هى و هو‬
‫و بعتنا نهنى و فرحة قلبنا مش سايعانا‬
‫

أكتر من كده تستاهلى و كان من حقك‬
‫و إنشاء الله كل الاحلام دى هتتحققلك‬
‫و يا رب تيعشى ف دنيا جميله لذيذه و حلوه‬
‫يالى إنتى إن غبتى دقيقه الكون كله بيشتاقلك‬

2009 Dreams

أحلام 2009
السنا دى أحلى بكتير م إللى فاتت
فيها كل قصة حقد و كره ماتت
فيها قلوب الناس فى كل الدنيا باتت
حاسة إن الكون ماليه هنا و سعاده

السنا دى كل حزن كان مالينا
راح لحاله و فاتنا ننسى دموع عنينا
و فاتنا ننسى آلام جروح كات عايشة فينا
و فاتلنا الحب و الخير بالزياده

أحلام كتيره و نفسى فى يوم نصحى نلاقيها
حقيقة واضحة و مستحيل حد يداريها
و كل الدنيا حاسة بفرحة قصاد عنيها
لكن تحقيق الحلم محتاج للإراده

أحلام بعيده و نفسى تكون مش مستحيله
و نفسى بس أوصلها و ما بيدى حيله
و السكة باين إنها صعبة و طويله
بس هاحلم ... أصل الحلم ده عندى عاده

Congratulating Eng. Youssef Mikhael on his new born child

يا ملاك

يا ملاك يالى أنت فى اللفه
خليت الدنيا دى ف لهفه
عايزاك تبقى ف غمضة عين
قبطان ماسك لها الدفه

يا راسم ع الوشوش بسمه
عشانك القلوب راسمه
أحلام ف دنيا ورديه
يا أجمل من هوى النسمه

نسيت من فرحتى أهنى
و لقيت القلب بيغنى
و بيدعيلك بعلو الصوت
تعيش ف الدنيا متهنى

Small Change For A Big Change Song

زى ما تعمل خير هتلاقى

زى ما تعمل خير هتلاقى
خير و محبه ف كل طريق
قدم سبتك بكره تلاقى
حدك فاكك عنك ضيق

و لما تلاقى الفرصه قصادك
إعمل خير و ما تترددش
لكن دايماً يبقى مرادك
إنك عنه ما تتكلمش

و نقطة خير لما بتتجمع
ويا بقيت النقط التانيه
تخلى الفرحه صوتها يسمع
كل مكان على وش الدنيا

Congratulating Yassmine And Abou Ouda on Their Marriage

قصة حب
قصة حب جديده اتكتبت
بين قلبين وياهم اترسمت
فرحه كبيره و دنيا ابتسمت
علشان تجمع بين حبيبين

حبيبين خلو العشق اتكلم
و قال بصراحه أنا عاوز اتعلم
علشان قلبى القاسى يسلم
و يعرف يقرا كلام العين

دعوه يعيشوا ف خير و سعاده
و تكون لهم البركه زياده
و ليهم الحب ده يصبح عاده
و ربى يبارك احلى روحين

Say Good Bye To Ahmed Mounir

تسلم عيونك
تسلم عيونك
و هتفضل
دايما ع البال

طبعك و لونك
دول أجمل
ذكرى و موال

يا فايتنا و رامينا ف بعده
أرواحنا لازم يتواعدو
عمر الحبايب ما اتباعدو
ف ليال طوال

يالى أنت ماشى
و سايبنا
بعدك أهوال

متنساناشى
و طمنا
دايما ع الحال

و لما تشتاق لماضينا
هيحن قلبك و تجينا
و نفتكر سوا حكاوينا
و نعيش ف خيال

Say Good Bye To Tarek el-Ganainy

حياه
أجمل شىء ف الحياه
صديق بتعيش معاه
و تشاركو ف كل لحظه
فى العمر لمنتهاه

تجمع بينكو الحظوظ
تفرح وياه يجوز
و خد بالك م الحياه
ما بتديش لو تعوز

و وداع بعديه رحيل
و دموع تنزل قليل
و نقول لبعض كلمة
نسيانك مستحيل

و الله يجازى القدر
بيفرق ف البشر
و بفراقنا دموع عنينا
تنزل زى المطر

و تدور بينا السنين
فايتالنا سؤال حزين
هنقابل بعض ولا
هنعيش متفرقين

2007-2008 Mid-term Song

السنة دى
السنة دى فيها خير
بس برضه خد لى "كير"
نقل الشيت طول عمره "فير"
فى "الإنجنييرنج سوفت وير"

شبكة فيها مية شبتر
قول متين أو يمكن أكتر
هاقرا فيه على قد ما اقدر
مره أطنش مره أكبر

و شوف لقيت فى الماده دى
“بى" وراها "ال سى"
معمل مره سوقت فيه
و شيت ركبنى و قال لى شى

و "الادفانسد داتا بييز"
شيت و معمل فى اللذيذ
حبة قراية و كله "بييز"
ده حقيقى شىء يغيظ

و الدرجات فى كل حتة
راح تستنى لحد امتى
قوم و خدلك خمسة ستة
وعبى حبة فى الجاكتة

و المواد سهلة و بسيطة
مش هاقول هبلة و عبيطة
الا ممكن تبقى زيطة
ما أنت عارفنا ناس حويطة

و أنا السنة دية
كل ده فى ايدايا
يمكن فى الدنيا دى أكون انا الوحيد

Against Israel's Massacres in Ghaza

‫أنا غزة...‬
‫عايشه فى حالة حرب مباغته‬
‫كله بيضرب فيا و ساكته‬
‫مش هتألم ولا هتكلم‬
‫بس حاول تتكلم أنت!‬

‫أيوه اتكلم قول الحق‬
‫ليه مش عاوز تصرخ لأ
‫قوم و اتحرك و ادعى لربك‬
‫ولا هتفضل جوه الشق‬

‫بس أنا راجعة و شايله أمانى‬
‫تملا الدنيا سلام من تانى‬
‫رغم الحرب و رغم الضرب‬
‫و رغم الكون كله ف عدوانى‬

‫هارجع تانى و مش راح أبيع‬
‫إللى سابونى لوحدى أضيع‬
‫بس هأقولك كلمة ف سرك‬
‫إن الظلم حقيقى فظيع‬

Say Goody To Yara Salah

‫تعبنا م الفراق‬
‫تعبنا م الفراق‬
‫و داع مع إشتياق‬
‫و تلف الدنيا بينا‬
‫و تاخدنا ف السباق‬

‫و ننسى كل حاجه‬
‫و نقول كانت سذاجه‬
‫و فجأة نلاقى روحنا‬
‫مشتاقه لكل حاجه‬

‫مشتاقه لذكرى فاتت‬
‫عشناها و فينا عاشت‬
‫فاكرينها كأن هى‬
‫زى النهارده كانت‬

‫لو ترجع بس ثانيه‬
‫و نعيشها مره تانيه‬
‫لكن هنقول لمين‬
‫الله يجازيكى دنيا‬

‫يالى أنت بتجرى بينا‬
‫ما تنسناش ماضينا‬
‫أو أى ذكرى حلوه‬
‫كات مره عايشه فينا‬

Congratulating Ahmed Sharkas on his New Born Child

‫ندى‬
‫ف الدنيا دى عمر ابتدى‬
‫فوق الجبين مكتوب عليه‬
‫يختاروا له اسم الندى‬
‫علشان أكيد لايق عليه‬

‫بنوته همست للهوا‬
‫و قالت له لازم تبتسم‬
‫و جمالها خلى الكون روى‬
‫أشجار ف لوحه بتترسم‬

‫الورد غيران منها‬
‫و بيتدارى عن العيون‬
‫و الشمس قالت إنها‬
‫مش عاوزه غير نورها يكون‬

‫يا رب فرح قلبها‬
‫و خليها تكون زينة البنات‬
‫و بارك ليها ف عمرها‬
‫و أملاه بالفرحه و الزينات‬

Rythem of Love 1

‫من حبها‬
‫من حبها ياما جرالى‬
‫شغلتنى و أنا كنت ف حالى‬
‫و سهرت عينى ليالى‬
‫حبتها جدا بصراحه‬

‫حبيت عنيها و ضحكتها‬
‫حبيت جمالها و رقتها‬
‫سحرتنى و الله بنظرتها‬
‫ام العيون الدباحه‬

‫و معاها أنا بانسى الدنيا‬
‫و الوقت كله يفوت ثانيه‬
‫و لقيت حياتى أنا حاجه تانيه‬
‫حياه لذيذه و مرتاحه‬

‫وياها بانسى أنا أحزانى‬
‫و الجنه بلاقيها مكانى‬
‫و لو هكون آدم تانى‬
‫هاكل عشانها التفاحه‬

Rythem of Love 2

‫حبيبتى‬
‫أحلى حاجه فيكى‬
‫سحرانى بلون عنيكى‬
‫خدينى كلى ليكى‬
‫يا أول حب ليا‬

‫إدينى حب قلبك‬
‫أو لحظه أعيشها جنبك‬
‫يالى أنتى كل ذنبك‬
‫شغلانى و ساكنه فيا‬

‫فكلامك أحلى همسه‬
‫ف إيديكى أحلى لمسه‬
‫يالى أنتى معاكى بانسى‬
‫كل الدنيا ديا‬

‫حبيت الكون عشانك‬
‫و عشقت أيام زمانك‬
‫و عرفت فين مكانك‬
‫ساكنه فقلبى و عينايا‬

Rythem of Love 3

‫زى حلاوتك‬
‫زى حلاوتك ما لقيتشى‬
‫و لا شوفت جمال‬
‫أبعد عنك ما أقدرشى‬
‫و طبعا ده محال‬

‫يا جميل من ساعة ما لمحتك‬
‫و أنا مشغول بيك‬
‫و بقيت أنا عايش لسعادتك‬
‫و القلب شاريك‬

‫و أنا مهما عملت ف دنيايا‬
‫مش راح أوفيك‬
‫يا أبو أجمل رنة ضحكايه‬
‫أنا دايب فيك‬

Rythem of Love 4

‫جننى‬
‫ ِّ‬محلى ها الننى‬‫ ِّ‬
‫سحره جننى‬
‫خلالى الجنه‬
مش بعيد عنى

روحت فجمالها‬
‫و روحى رايحالها‬
‫و قلبى ف إيديها‬
‫و رموشها حابسنى‬
‫
‫يالى حاسدنا‬
‫ما فيش فراق بينا‬
‫دى حبيبتى جوايا‬
‫و خلاص بقت منى‬

Welcome Back Eng. Youssef el-Dakar

من بعدك

من بعدك و الله إتعلمنا
ما نفرط فيك
ياللى أنت بعادك علمنا
إزاى نراضيك

من ساعة ما عرفت وصولك
و أنا نفسى أروحلك و أزورك
ياللى أنت نورت بنورك
الكون حواليك

و لما رجعتلنا من تانى
رديت الفرحة لوجدانى
و عشانك هأنسى أنا أحزانى
لو كان يرضيك

و لو حتى غيابك كان طول
عن دربك و الله ما هتحول
ده أنا قلبى حبك من أول
ما سلمت عليك

Say Good Bye to Dina Ezzat

‫الفراق أمر‬
‫إخترت تبعد عنا‬
‫ولا الفراق أمر‬
‫يالى أنت كنت بينا‬
‫ملاك بين البشر‬

‫و أبدا مش هننسى‬
‫و مهما البعد طال‬
‫حالفين إن إحنا لسه‬
‫هنبقى على إتصال‬

‫يالى أنت سايبه لينا‬
‫ذكرى ف كل مكان‬
‫هتبقى عايشه فينا‬
‫أقوى من النسيان ‬

‫و سامحينى مش لاقى‬
‫كل الكلام إتقال‬
‫و أنا عمرى لو باقى‬
‫هاهديك ميت موال‬

When Dina Asked "Where is My Farewell Song!!?"

‫متلخبط‬
‫طلبت ف يوم منى‬
‫أهديها أغنيه‬
‫فجأة لقيتا إنى‬
‫خلص الكلم فيا‬

‫حسيت ف قلبى سكوت‬
‫و عيون محوطانى‬
‫و بخوف يهد بيوت‬
‫و أنا لسه ف مكانى‬

‫مش عاوز أتحرك‬
‫ولا عارف أتكلم‬
‫قلتلها من فضلك‬
‫أنا لسه باتعلم‬

‫و من قبل ما أتورط‬
‫و من غير ما احسبها‬
‫قلتلها متلخبط‬
‫مش عارف أكتبها‬

Dish Party 1

حفلة أكل
سمعنا كلام إتقال و أكيد
إن الرؤسا هيبقو بعيد
فكر حد بشكل مفيد
و قال لنا نعمل حفلة أكل

بشرط يكون الأكل دا بيتى
جبت أنا أكلى و ملحى و زيتى
و أعدت أطبخ كده سكيتى
أصل الطبخ دا محتاج عقل

أول حاجة تجيب مكرونه
و فرخة كبيرة تكون مجنونه
و صلصة بشطة تكون موزونه
و تبقى ساعتها لقيت الحل

أكله سريعه و سهله كتير
أكله لذيذه بطعم خطير
خلت أبله نظيره تغير
أصل الاكله دى حلوه بشكل

Rural Breakfast

هم هم (المعدله)
لا تقولى مخلى و لا بفتيك
و بوم فريت و فيليه و ستيك
صباحنا فل اسم الله عليك
دا فطارنا بلدى و من غير ليه

عسل طحينه و عيش فينو
و عسلنا لأبيض نحلينو
و فطير مشلتت عارفينو
آه يا روحى عليه

لا تقولى بيتزا و سيمون فيميه
و فروت سلاد و خضارنا سوتيه
خليك معانا هتعرف ليه
و شوف فطارنا و سمى عليه

خدلك طبق م المتعبى
المش ابو دود متخبى
ده بجد طعمه سكن قلبى
و احتارت أنا فيه

Welcome Back Eng. Youssef Mikhael

‫أهلا و سهلا
‫‫أهلا و سهلا يا غالى‬
‫ضيك منور ليالى‬
‫و مهما بتبعد هتفضل‬
‫صورتك دى ساكنه ف خيالى‬

‫نورت كل المطارح‬
‫و سامحنى لو قلبى صارح‬
‫كل الدنيا إنه حبك‬
‫و أعذرنى دا الفرح طارح‬

‫و ياريت ما تبعدش عنا‬
‫على طول تكون جنب منا‬
‫أصل إحنا دايما ف بعدك‬
‫بنحب نلعب بديلنا‬

Say Thank You to Monia Abouheif For The Dish Party Arrangements

حلم و لا علم
شفت أنا مره ف وقت الحلم
ناس فرحانه ف وقت السلم
فجأه لقيته إتحول علم
و حاله تفرح عمرى الجاى

حاله جميله يارب تدوم
ضحكه جميله ف بحر هموم
و بقينا عيله كبيره ف يوم
و بقى اليوم ده ماله زى

فرحان قلبى و نفسه يطير
وقت أنا عشته بجد خطير
راح وياه تعب المشواير
وراحت توهتى ف قلب الحى

بجد أنا بشكر صاحب الفكره
علشان سابلنا أجمل ذكرى
نحلم بيها لغاية بكره
و تملا حياتنا بأجمل ضى

Ridiculous 1

تخاريف
الدنيا برد و بتمطر
طاب و إحنا مالنا ما تمطر
بنمشى من غير ما نفكر
فى الحب و الخير مش أكتر

و مين يقول إن أنا ناسى
كراسى وياها شماسى
أفكار كتير جوه ف راسى
خلتنى أفقد إحساسى

ف الإمتحان ده أنا عاكك
و م المحاضره أنا فاكك
شعر جميل أسود حالك
سيبينى خليكى ف حالك

يا أم العيون الدباحه
يا أم الخدود التفاحه
خلينى أقولك بصراحه
كفايه بزياده أباحه

و رق شجر أخضر و جميل
و فيلم بايخ دمه تقيل
مراعى خضره و فيها نخيل
و أنا أعمل إيه لجل أنت تميل

هاروح وياكى ألف الكون
م إسكندريه لحد ليون
فى أى مكان و مهما يكون
ما عدا مكتب المأذون

Forget About it

إنسى
إنسى شىء عداك و فاتك
إنسى خلاص بقى ذكرياتك
إنسى كل كلام آهاتك
إنسى يلا و عيش حياتك

إنسى و عيش كده من جديد
خلى بكره و بعده عيد
و لو قلبك قال يوم نعيد
إبعد الأوهام بعيد

لو شاور لك مره تانى
إبتسم له و قوله يانى
لو فى يوم تزعل عشانى
راح نجدد الأمانى

ليه تسبنى أنسى ذكرى
ليه تسبنى أنسى فكره
ليه تسيبنى أقوله بكره
آه يا قلب يغيظ و يكره

آه بيكره بس طيب
عمره ما كان ف يوم يخيب
أمل زرعته أنا من قريب
ذكريات دايماً تلهلب

ذكرى فيها قرص نحله
بكره يمكن تبقى أحلى
لو مسافر يوم ف رحله
إبتسم راح تبقى أحلى

Easter

شم النسيم
صحيت من أول النهار
بصيت لقيت الكون عمار
قولت أكيد ما فيش هزار
ده يبقى يوم شم النسيم

الأرض لابسه توب جديد
و طيور تغنى لكون سعيد
حسيت بجد إحساس فريد
إكمنه كان عيدنا القديم

الجو فيه أجمل هوا
و الورد فيه أجمل دوا
و قلوبنا مع بعض و سوا
بتودع الجرح الأليم

و هيفضل عيدنا لحد ما
تتوقف نبضات الحياه
يا أجمل عيد ف الكون ده يا
يا مخلى الكون حلو و وسيم

Enough

كفايه
جاى تقولى هنبقى أصحاب
بعد ما عشنا سنين أحباب
إبعد عنى كفايه عذاب
عشت ف حبك راضى بحالى

إستحملت أنا كل جنونك
ويا عذاب غيرتك و ظنونك
ولا فكرت ف مره أخونك
و أتعذبت أيام و ليالى

يالى بايعنى أنا كنت شاريك
عايش عمرى عشان أرضيك
عشت أتمنى بروحى أفديك
و كنت أنا فاكرك عمرى الغالى

بس خساره طلعت أنانى
و عشت لنفسك مش علشانى
ف لحظه قدرت إنك تنسانى
و تنسى أحلامى و كل أمالى

قصة حبك كنت كاتبها
بس خلاص ما بقتش حاببها
و رغم الذكرى إللى أنت سايبها
توهت و ضعت خلاص من بالى

Egyptien (en Francais)

مصريه
مصريه بعيون مصريه
خطوتها شابه و عصريه
نسمة هواها الصبحيه
و هى رايحه الكليه
بتخلى الورد العطشان
ينطق يقول إدينى ميه

يا أم العيون العسليه
إدينى نظره بحنيه
و حطى إيدك ف إيدايا
و خلينى أحلم يا عينايا
و مهما أكون أنا تعبان
هواك رد الروح فيا

يا أم الشعور الدهبيه
نفسى فى مره تكونى ليا
هاكتب ف قصة رومانسيه
حكايتنا دى مش خياليه
لو قلبى بات يوم كان زعلان
يسأل يقولى فين هيه

Begining of 2006

أنشودة بلادى
لفيت بلاد الحيره
و شفت بلاد الغيره
و مشيت فى سكه طويله
و قلبى و الله ف بعدك ما بيقساش

النيل ده ف روجى و دمى
و الصخر ده بيحمل إسمى
و الشمس دى ف لونى و رسمى
و قلبى برضه غيرك ما بيهواش

يا بلادى إنت إللى ليا
ما لى غيرك ف الدنيا ديا
و بحبك و بكل ما فيا
و قلبى لسه ف حبك ما بيهداش

ف بعادك قلبى المتغرب
بيحبك أكتر و يقرب
يناديلك ما بينسى و يهرب
ده قلبى و الله فاكرك و ما بينساش

A Song for Samy Nessim to Compose (2005)

خساره
يا عيون غاليين عليا
يا رموش سحرت عينايا
هأفضل أحبك يا عمرى
يا أجمل م الدنيا ديا

ع البحر أنا بأقضى يومى
و أغسل حزنى و همومى
من يوم ما عرفت إنى
مش ليك ولا أنت ليا

دانا كل ما أبعد بأقرب
ف الحب اسأل مجرب
هو سابنى و نسيينى
ولا ما فكرش فيا

كان نفسى أبوح و أقوله
عن قصة حبى كله
هو إللى كان ف نفسى
أبقى له و يبقى ليا

لعنيك سلمت أمرى
يا حبيبى يا كل عمرى
ليه تسبنى و تهوى غيرى
كنت استنيت شويه

2000-2001

ناس
ناس تخاف ما تختشيش
و ناس تخاف عشان تعيش
و ناس تخاف من أى حاجه
و ناس تخاف من الشاويش

و ناس كتير أوى و غلابه
و ناس كتير أوى و ديابه
و ناس كتير بس و خلاص
و ناس كتير زى السحابه

و ناس بتمشى ف كل حته
و ناس تقول الساعه سته
و ناس تلف و ناس تدوخ
و ناس تقطع الجاكته

و ناس تنادى بأعلى حس
و ناس تقول للقطه بس
و ناس تقول ده كان ف نفسى
و ناس بتجرى عشان تخس

و ناس تعيش بألف وش
و ناس تعيش عشان تغش
و ناس تعيش على قد حالها
و ناس تقول لك طز فش

a collection of poems and articles by mohamed adel basyouny (dola) is licensed under a Creative Commons Attribution-Share Alike 3.0 Unported License.
Permissions beyond the scope of this license may be available at http://creativecommons.org/choose/cc-gpl

1999-2000

مغروره
الغرور باين عليكى
الغرور جوه ف عنيكى
حتى لمساتى لإيديكى
راح ف يوم تفتن عليكى

العيون دايما بريئه
و الرموش دايما جريئه
جوه قلبى فى حريقه
قول فين بس الحقيقه

حبى ليك مالهوش بدايه
قلبك حط له النهايه
لو تحب تكون معايا
مش هابص ف يوم ورايا

هانسى كل شىء سمعته
هانسى جرح ف يوم زرعته
هانسى شىء ف مره شفته
هانسى حبى إللى أنت بعته

فى النهايه سيبنى أقولك
ياللى مافى شىء يهمك
الغرور ده شىء ف طبعك
الغرور لازم يضرك

Ridiculous 2

تخاريف 2
بانزل الصبح أنا من بدرى
بتمشى ساعات و ساعات بجرى
أنا سامع أصوات و غريبه
م انا أصلى شربت لبن بقرى

أركب الصبح أنا مركبتى
و أغمز للسناره حبيبتى
و إذا رقص الموج نرقص شله
و السمكه بتتضحك على خيبتى

مش عارف على فين أنا رايح
ده أنا حتى ناوى من إمبارح
أخرج ويا حبيبتى الحلوه
أركب أنا و هى حصان جامح

هاضحك للشمسه و للضله
و أفرح بالكتره و بالقله
ربك بيقسك كيف يشاء
و عبيط إللى يعيشها بذله

بأشرب أنا شايى و نعناعى
و الشمس تحمرلى دراعى
أهرب منها جوه الضله
و الضحك بيغلب أوجاعى

أنا عمرى ما كنت ف يوم احتار
أركب أتوبيس أو حتى حمار
لكن كان نفسى أكون موسيقار
و العب ألحان على أحلى جيتار