بياع

أنا لما عرفت أنا قولت بجد
إن أنت مشيت ولا قولت لحد
و بكل بساطه نسيت الود
أما أنت صحيح شكلك بياع

جاوبنى يا ريت لو عندك رد
لو مره غلط أنا من غير قصد
يرضيك صداقتنا خلاص تنفض
من غير لا سلام ولا حتى وداع

أنت ما تعرفش إن أنا مش قد
أخبار عنك أسمعها أتخض
و رغم إللى ما بينا كلام يتعد
هستنى الرد قبل ما يتذاع

حاله

يمكن تكون كلمات و حروف
يمكن تكون أحوال و ظروف
يمكن تكون بعض الظنون
لكن سببها دا مش معروف

هتعلم دايما أقول الحق
هتعلم أقول للظالم لأ
هتعلم إنى أعيش و كأنى
ماباخفش أنا غير من خالق الخلق

هتعلم أصارح نفسى بجد
مش هاقسى بقلبى ف يوم على حد
هتعلم أكون أخ حنون
مش بس مجرد عود إتشد

هتعلم أكون أنا صاحب صوت
هتعلم أبطل أعيش ف سكوت
هتعلم دورى إكمنه ضرورى
و هتعلم أعيش أنا قبل ما أموت

بحبك

بحبك حب ماله حدود
لكن كل إللى بينا سدود
حلمت بيوم تكونى لى
و قلبك أبقى فيه موجود

عشقتك قبل ماعرف مين
يا أول حب بعد سنين
عشت فيها وحدانى
و كان فى الوحده قلبى حزين

بسحر عنيكى شغلانى
بنظرة سكنتى فى كيانى
فى بعدك أيوه بتعذب
يا أجمل حاجه وحشانى

هنسى مع إنى بتألم
عشان مش قادر أتكلم
دا أول حب لينا أكيد
لازم فى قلوبنا بيعلم

أيام

هما يومين و خلاص هتحرر
بعد ما عشت أنا عيشة البربر
وسط الصحرا و أراضى ضحله
و لبس يعر و ما فيهوش منظر

ألف وداع يا دموعى و يأسى
ما عدتش تانى أنا هسأل نفسى
هخلص إمتى عشان الجته
كات محتاجه لحاجه تنسى

همشى ف وسط بلادى أرفرف
و أقعد ويا صحابى أستظرف
مش بالأمر عشان العمر
ما بقاش ملك لواحد مقطف

يلا يا دنيا إحلوى عشانى
أصلى بقيت سلطان لزمانى
و هعمل خير ويا الغير
علشان ربى خلاص نجانى