حزب سياسى
عاوز أفصل حزب سياسى
يكون مضبوط على قد مقاسى
له ف المجلس رأى أساسى
حتى و لو كان كل ده كدب
عاوز أكون شيخ فوق المنبر
ف أى مناسبة أهلل أكبر
أحلل، أحرم، أصدق، أكفر
على كيف كيفى و زى ما أحب
عاوز أرشح نفسى رئيس
و أحكم مصر اتنين و خميس
ف أى إذاعه أقول أحاديث
و يعجب كل كلامى الشعب
عاوز أداوى كل جروحى
ألملم حزنى و أطيب روحى
إوعى يا نفسى بسرى تبوحى
و دارى همومك جوه القلب
أمى
تملى ف عيونك بلاقى الحنان
و بشعر ف حضنك بكل اﻷمان
يا أصدق معانى عرفها الزمان
يا أول حكاية كتبها القدر
يا غنوة حياتى يا لحن الخلود
يا فجر المشاعر يا سر الوجود
غرامك ف قلبى معدى الحدود
يا نسمة عصارى يا أجمل قمر
يا بسمة تداوى جراح القلوب
يا همسة تخلى العاصى يتوب
يا دعوه لربى بتمحى الذنوب
يا لمسة رقيقة تلين حجر
يا نجمة ف توهتى تنور طريق
يا طوق النجاة فى بحرى الغريق
يا حبى الحقيقى يا أول صديق
يا أمى يا غاليه يا أجمل بشر
نعم و ﻻ
قلبت فى المواضيع
ما كنش فهمى سريع
قول "ﻷ" أﻻ نضيع
لكن "نعم" أجمل
محتار ما بين جنبين
ما أقدرش أقول ل اتنين
لو بس ليا صوتين
يبقى القرار أسهل
قول "ﻷ" ف وش الظلم
قول "آه" لوقت السلم
جاوبو يا أهل العلم
أنهى إختيار أعقل
شاور يا موج البحر
شاور يا رمل البر
شاور يا صوت الشعر
ع الإختيار ل امثل
حاسس بإيه
حاسس بإيه بعد النجاح..
نجاحنا فى ثورة بإكتساح
هنخلى بيها الكون براح
حاسس أساسا وﻻ ﻷ؟؟
وقفنا نهتف فى الميدان
فى وش أى حد خان
ماكنش موجود فى المكان؟؟
وﻻ السمع عنده إتخرق؟؟
و كل يومين رافع شعار
بيقول ده أحسن إختيار
أول ما نبدأ فى العمار
يرجع من مطرح ما ابتدأ
دماغه أضيق م الحارات
و عقله ماشى بنظارات
ما سمعتش منه غير سكات
إكمنه عايش ع الورق
كل المعانى المدهشة
حشاها توهه و دروشة
و حلم العمر جه و مشى..
و ماعدش فاضل غير قلق
علشانك
يا مصر يا بلادنا
يا عروسة م الجنة
قالوا فيكى كتابنا
أجمل كلام يتقال
يا مصر فى ميدانك
ضحينا علشانك
أسقطنا من خانك
و زحنا حمل جبال
يا مصر شعبك حر
هيعدى بيكى لبر
بالإجتهاد و الصبر
هيصلح اﻷحوال
يا مصر لمة الشمل
ولا عمر صبرك قل
و إن زاد عليكى الحمل
عنك.. أنا الشيال
هضحيلك
بحق الجرحى و الشهداء
حروف الدنيا و الأسماء
و موسى و عيسى و العذراء
و قرآنك و إنجيلك
بحق الصحرا و الوديان
بلاد الأرض و الأوطان
و رمل البحر و الشطآن
و ميه شاربها من نيلك
بحق النغمة و الأوتار
حلاوة لحن بالمزمار
كلام الحب و الأشعار
و قلب عاش يغنيلك
بحق الصحبة و الأصحاب
و دفء مشاعر الأحباب
و كلمة صدق جوه كتاب
يا مصر هعيش أضحيلك
بلادى
هتفنا فى كل ميادينك
تعيشى يا مصر عاشقينك
بكل العمر شاريينك
ماهو أنت الباقية مش إحنا
يا مصر يا أرض أجدادى
جينالك قبل ما تنادى
رفعنا للسما أيادى
و حلفنا نعدى م المحنة
شهيدك كان بيتمنى
يشوفك حتة م الجنة
أمانة راح و سابهلنا
نغير فيكى و نجحنا
راح أقلب كل ليل لنهار
هجمل و أبنى الف مسار
يخلى أرض بلدى عمار
دى أغلى علينا من روحنا
