رسالة الى الوالي
حتى و لو راح تفتح عكا"
او تدّينا شوية فكّه
أخرج بره و خد لك سكّه
"مش عايزينك هنا يا أخينا
كلمة إتقالت فى الإعلام
هى حقيقة ولّا كلام؟
إزاى جالك قلب تنام
و أنت ف عين الناس حرامينا
أنا لو منك أطلب أحقق
فوراَ قبل الناس ما تصدق
إنك خايف قوى و مقلّق
من أوراق كشفت بلاوينا
خايف ليه من كلمة قالوها
و عايز ليه ترمينا ف توهه
كذّب أى آيات رفعوها
و برّء نفسك يا افندينا
البقاء لله
ماتت خلاص و راحت
ثوره برئيس أطاحت
كنّا فاكرينها زاحت
الظلم و الطغيان
معادنا يوم الجمعة
على روحها نصلى ركعة
و نولع ليها شمعة
كمشاركة فى اﻷحزان
مافيش عزاء نهائى
ﻷهل شهيد فدائى
و ماعدش لينا باقى
غير رحمة الرحمن
أحلام الثورة
بحلم أنام تحت الشجر
و عيونى تسرح فى القمر
من غير هموم من غير آلام
ولا قلب خايف من خطر
بحلم الاقى ف شمسى ضى
ماليا بجمالها كل حى
و استنى بكره إكمنه جاى
يقرب اﻷحباب لنا
بحلم أعيش و الكون براح
ماندمش لحظة علّى راح
من غير زعل، من غير جراح
والفرح يكون مكتوب لنا
بحلم تفتح لى بوّابتها
و أعيش و أموت وسط دراعاتها
لكن تملى بلّاعتها
بتبلع حلم عمرنا
موقعة الصينية 9/9 2011... و أعدوا
مش جايين لوحدنا
مش هنمشى من هنا
الميدان ده مش بتاعك
ده بتاعنا كلنا
مهما تغير من وشوشك
مهما كات قوة جيوشك
لو كل العروش عروشك
مش هتسرق حلمنا
إحنا خرجنا من بيوتنا
خلاص هربنا من سكوتنا
ولو عشان حقوقنا متنا
هتبقى موته حنينه
فى الغالب
سألتينى.. و فى الغالب
أنا مع.. مش ضد بحارب
مع الوصول لبر أمان
و قلبى.. هعمله قارب
بحبك.. لسه مش عارف
ملامحك.. لسه مش شايف
بعيد عنك و أنا جنبك
فى حضنك.. برضه أنا خايف
عشانك.. قولت مية غنوة
غرورك.. قال عشان حلوة
الحلو حلو طباع مش شكل
و حب الشكل.. ده نزوة
بعقلك.. ولا بجنونك
بغيرتك.. ولا بظنونك
ماليش غيرك يا بلدى يا مصر
و بدعى.. ربنا يصونك
لسه بحبك
مش غرور ولا كبرياء
مش ملاوعة و مش نفاق
مش بعاد و مش فراق
ده كل شىء وله تمن
مش بحاول أكون بعيد
عمر طبعى ما كان عنيد
بس عشت سنين وحيد
و مش هعاتب الزمن
و مهما هبعد مش ناسيكى
أصلى بعمل كله ليكى
ياللى عشت عمرى فيكى
و كنت جنبك فى المحن
عاوز أخلى لك مكان
كان ده حقك من زمان
ياللى شعبك أصله بان
و أصبح مصرى يؤتمن
ﻷنك
ﻷنك مش وطن محدود
ﻷنك مش طريق مسدود
ﻷنك مش حبال و سدود
ﻷنك فجر للدنيا
ﻷنك مش كابوس أحلام
ﻷنك مش سراب أوهام
ﻷنك مش حروف و كلام
ﻷنك من زمان فيا
ﻷنك مش سحاب و غيوم
ﻷنك مش عذاب و هموم
ﻷنك مش قلوب بتلوم
ﻷنك أغلى ما ليا
ﻷنك مش ظلام فى الليل
ﻷنك مش آهات وﻻ ويل
هشيلك بين ضلوعى شيل
يا مكتبة إسكندريه
خلينا نحلم
خلينا نحلم، بس حلم يكون جميل
نقدر نطوله، حتى لو كان مستحيل
نبنيه بإيدنا، و يبقى حلم كل جيل
إنه يكمل، حتى لو طال الطريق
خلينا نصبر، ع الحياه و لو تميل
هتبان حقايق، عن خيانة و عن عميل
أصل المواقف، تكشف معدن الأصيل
و مين بايعنا، و مين تملى كان برىء
خلينا نبدأ، المشوار ولو طويل
ف نهايته فرحة، و عن نهايته ما فيش بديل
لو توهنا مره، نلقى فى قلوبنا الدليل
خليك معانا، دا المشوار محتاج صديق
إقرأ
إقرأ بسم ربك الذى خلق
الحياة و الممات و النبات و الورق
ألم ترى الذى عصاه فاحترق؟؟
لو كان يهمك.. لما لم تدعوا له الرب يهديه؟
بسم الشريعه قطعنا أيدى من سرق
حبسنا الحلم فى الجفون حتى إختنق
أنقذنا دستور الغزاة من الغرق
ما فضلش ياما.. فلم يعد للشعب شىء يؤويه
بسم الشهادة أنعى دماء من سبق
أخفى البكاء و الدمع من عينى إنزلق
أصدر بيان:القلب عن وطنى افترق
ما عدتش تفرق.. فلمصر رب يحميه
حزب سياسى
عاوز أفصل حزب سياسى
يكون مضبوط على قد مقاسى
له ف المجلس رأى أساسى
حتى و لو كان كل ده كدب
عاوز أكون شيخ فوق المنبر
ف أى مناسبة أهلل أكبر
أحلل، أحرم، أصدق، أكفر
على كيف كيفى و زى ما أحب
عاوز أرشح نفسى رئيس
و أحكم مصر اتنين و خميس
ف أى إذاعه أقول أحاديث
و يعجب كل كلامى الشعب
عاوز أداوى كل جروحى
ألملم حزنى و أطيب روحى
إوعى يا نفسى بسرى تبوحى
و دارى همومك جوه القلب
أمى
تملى ف عيونك بلاقى الحنان
و بشعر ف حضنك بكل اﻷمان
يا أصدق معانى عرفها الزمان
يا أول حكاية كتبها القدر
يا غنوة حياتى يا لحن الخلود
يا فجر المشاعر يا سر الوجود
غرامك ف قلبى معدى الحدود
يا نسمة عصارى يا أجمل قمر
يا بسمة تداوى جراح القلوب
يا همسة تخلى العاصى يتوب
يا دعوه لربى بتمحى الذنوب
يا لمسة رقيقة تلين حجر
يا نجمة ف توهتى تنور طريق
يا طوق النجاة فى بحرى الغريق
يا حبى الحقيقى يا أول صديق
يا أمى يا غاليه يا أجمل بشر
نعم و ﻻ
قلبت فى المواضيع
ما كنش فهمى سريع
قول "ﻷ" أﻻ نضيع
لكن "نعم" أجمل
محتار ما بين جنبين
ما أقدرش أقول ل اتنين
لو بس ليا صوتين
يبقى القرار أسهل
قول "ﻷ" ف وش الظلم
قول "آه" لوقت السلم
جاوبو يا أهل العلم
أنهى إختيار أعقل
شاور يا موج البحر
شاور يا رمل البر
شاور يا صوت الشعر
ع الإختيار ل امثل
حاسس بإيه
حاسس بإيه بعد النجاح..
نجاحنا فى ثورة بإكتساح
هنخلى بيها الكون براح
حاسس أساسا وﻻ ﻷ؟؟
وقفنا نهتف فى الميدان
فى وش أى حد خان
ماكنش موجود فى المكان؟؟
وﻻ السمع عنده إتخرق؟؟
و كل يومين رافع شعار
بيقول ده أحسن إختيار
أول ما نبدأ فى العمار
يرجع من مطرح ما ابتدأ
دماغه أضيق م الحارات
و عقله ماشى بنظارات
ما سمعتش منه غير سكات
إكمنه عايش ع الورق
كل المعانى المدهشة
حشاها توهه و دروشة
و حلم العمر جه و مشى..
و ماعدش فاضل غير قلق
علشانك
يا مصر يا بلادنا
يا عروسة م الجنة
قالوا فيكى كتابنا
أجمل كلام يتقال
يا مصر فى ميدانك
ضحينا علشانك
أسقطنا من خانك
و زحنا حمل جبال
يا مصر شعبك حر
هيعدى بيكى لبر
بالإجتهاد و الصبر
هيصلح اﻷحوال
يا مصر لمة الشمل
ولا عمر صبرك قل
و إن زاد عليكى الحمل
عنك.. أنا الشيال
هضحيلك
بحق الجرحى و الشهداء
حروف الدنيا و الأسماء
و موسى و عيسى و العذراء
و قرآنك و إنجيلك
بحق الصحرا و الوديان
بلاد الأرض و الأوطان
و رمل البحر و الشطآن
و ميه شاربها من نيلك
بحق النغمة و الأوتار
حلاوة لحن بالمزمار
كلام الحب و الأشعار
و قلب عاش يغنيلك
بحق الصحبة و الأصحاب
و دفء مشاعر الأحباب
و كلمة صدق جوه كتاب
يا مصر هعيش أضحيلك
بلادى
هتفنا فى كل ميادينك
تعيشى يا مصر عاشقينك
بكل العمر شاريينك
ماهو أنت الباقية مش إحنا
يا مصر يا أرض أجدادى
جينالك قبل ما تنادى
رفعنا للسما أيادى
و حلفنا نعدى م المحنة
شهيدك كان بيتمنى
يشوفك حتة م الجنة
أمانة راح و سابهلنا
نغير فيكى و نجحنا
راح أقلب كل ليل لنهار
هجمل و أبنى الف مسار
يخلى أرض بلدى عمار
دى أغلى علينا من روحنا
مذنب برىء
ما لاقتش آية أو حديث
بيقوللك دمر الحياة
بالعكس دينى كان حريص
على كل شىء حتى النبات
أنا دينى قال أهل الكتاب
يشوفوا منى كل خير
حتى المعاملة بالحساب
مالمسش معبد ولا دير
إيه ذنب ناس لابسين جديد
رايحين يصلوا فى الكنيسة
يتقتلوا غدر وقت عيد
دى النفس غالية مش رخيصة
و من أيام سيدنا إبراهيم
و الناس بتصلى لربنا
كلام سليم أو مش سليم
ربك يحاسب مش أنا
إزاى نخون أقرب صديق؟؟
دى أكيد مش إيدنا المسلمة
و إنك تكون مذنب برىء
دى بجد حاجة مؤلمة
من بعيد
برمى نظره من بيعد
من على السور الحديد
جنب مدرستى القديمه
و أفتكر صاحبى الوحيد
صاحبى كان صاحب بجد
كان مستحيل يبعدنا حد
عمرى ما قلت بصلى جمعه
و عمره ما قال لى بصلى حد
و أفتكر أيام زمان
ما كانش فيه فرق ف مكان
جوه جامع أو كنيسة
ويا بعد مهما كان
و أفتكر صوت الهوا
و عشقنا للون السما
و ضحكنا و لعبنا
و فرحنا و إحنا سوا
و داع يا أكتر من صديق
يا أغلى من أخ و رفيق
و مش هلوم أبدا وطن
أصل الوطن دايما برىء
