قايمة أصدقائى

فى قايمة أصدقائى كل الناس بحترمهم

و ناس على طول فى بالى و عايز افتكرهم

ما أقدرش أعيش حياتى لو هخسر حد منهم

دول فعلا أصدقائى من أكتر من سنة

فى قايمة أصدقائى الناس كالمعجزات

شباب فعلاً رجولة و يقدِّم تضحيات

بنات زى الورود و سكر النبات

كان نفسى يعرفونى أو أعرفهم أنا

فى قايمة أصدقائى الناس مؤدبة

و شباب فعلا مشايخ و حياته مرتبة

وشباب لابسين بدل و بنات محجبة

و مهما بعدوا عنى مش هنساهم أنا

فى قايمة أصدقائى أصحاب فعلا تمام

من جوا زى برا يستاهلوا الإهتمام

و ناس أصلاً وجودهم بيخفف الآلام

خليكم أصدقائى و عقبال مليون سنة

قبل المراكب ما تتحول بيوت...

في وسط غيوم الكون هتلاقي

شمس بتضحك وسط الزحمة

صوت بيدفّي ودايماً باقي

على طول جنبك وقت الازمة

ومهما تداري في وسط سحابها

فجر مشاعرك او احلامك

جمد قلبك و افتح بابها

واكسر خوفك ويا عذابك

و لما تطوّل تبدأ ترسم

اول حب وسحر كلامها

ولو هتبوح بالسر بتكتم

كل كلامك جوه غيامها

نفسي اطوف الكون واغني

لحن محبة واسمع صوت

دقة قلب ونبض تمنّي

قبل مراكبي ما تبقى بيوت

حَبِّة معانى

سوَّاح و هايم و عابر سبيل

بيحلم بصحبة و شمس و دليل

و حَبِّة معانى توصَّل لسكِّة

بر السلامة .. و حلمه الجميل

بيحلم بنظرة من حب سابق

بلحظة تلاقى من قلب فارق

بكلمة ترجع حدود الكلام

لقبل أمّا ينطق بحبك و غارق

بيحلم بقلب فى حالة محبه

ينسِّى الجراح و ذكرى الأحِبَّه

يرجع أمانى و نبض الحياة

يصدق مشاعره و مايقلش كدبه

بيحلم ببكرة أحلى لبلاده

و حالف يرجع ضحكة ولاده

لولا إن عمره مش ملك إيده

عمره ما يخلف مرَّه ف ميعاده

ازرع كل الأرض مقاومة

توِّه خوفك وسط الزحمة

هدّ بشمسك سور الضلمة

ازرع كل الأرض مقاومة

مدّ فى كل الأرض جذور

كون البادىء، كون البادىء

كل هتاف الحق بنادق

غير الدم ما حدش صادق

اهتف اعلى تشق بحور

ادعى لربك، ادعى لربك

جوّه السجن ما حدِّش جنبك

حُب بلادك جوه فى قلبك

وسط الضلمة يمد النور

تغيب الشمس

تغيب الشمس

تغيب الشمس يا بلادى و بتبصى

تلاقى إيدايا حضناكى فى يوم عرسى

و يوم ما تنادى تلقى قوام

فداكى مييت مليون ولد تونسى

تغيب الشمس يا بلادى و ما تغيبى

و أشيب و أكبر و عمرك يوم ما بتشيبى

و لو ما طلعت م الدنيا دى بجاه و لا مال

كفاية عليا و شرف ليا أكون ليبى

تغيب الشمس با بلادى و تتمنى

تكون أيامك الجاية بتسمعنى

و بإذن الواحد القهار هيجى نهار

يخلصنا من البشار ولد يمنى

تغيب الشمس يا بلادى و ساعة العصر

بتسقى الحلم فنجان شاى محلى بصبر

و لما الحلم يسرقنى... صدقنى

بلاقى صليبى و آذانى بيحضن مصر

What's Wrong??!!

رسالة الى الوالي

حتى و لو راح تفتح عكا"
او تدّينا شوية فكّه
أخرج بره و خد لك سكّه
"مش عايزينك هنا يا أخينا

كلمة إتقالت فى الإعلام
هى حقيقة ولّا كلام؟
إزاى جالك قلب تنام
و أنت ف عين الناس حرامينا

أنا لو منك أطلب أحقق
فوراَ قبل الناس ما تصدق
إنك خايف قوى و مقلّق
من أوراق كشفت بلاوينا

خايف ليه من كلمة قالوها
و عايز ليه ترمينا ف توهه
كذّب أى آيات رفعوها
و برّء نفسك يا افندينا

Rest In Peace

البقاء لله

ماتت خلاص و راحت
ثوره برئيس أطاحت
كنّا فاكرينها زاحت
الظلم و الطغيان

معادنا يوم الجمعة
على روحها نصلى ركعة
و نولع ليها شمعة
كمشاركة فى اﻷحزان

مافيش عزاء نهائى
ﻷهل شهيد فدائى
و ماعدش لينا باقى
غير رحمة الرحمن