أحلام 2011
كل ما بتيجى ف خيالى بحلم أكتر
أصل أحلامى السنادى بيكى تكمل
و مهما قلت فيكى شعر أنت أجمل
من كلام الدنيا كله.. صدقينى
آه بحبك.. مش هدارى و لو لامونى
دا أنت أغلى شىء لمسته بنور عيونى
و مهما حاولوا عنك أنت يبعدونى
مش هسيبك أصلى حاسك بتنادينى
أيوه عارف كلمة حب مش كفاية
بس شاورى.. هرمى كل الكون ورايا
و لجل خاطرك هبقى جنبك للنهاية
و أعترف بإن حبك شىء مالينى
أيوه عاشقك زى ما أنت عشق نار
و لو هعيش ما بين شوارعك ف المرار
أصلى مصرى و مصرى أصلى مش هزار
دورى عنى ف ملامحك.. هتلاقينى
اللحظة دى
فى اللحظة دى عمرى ابتدا
ما بقتش خايف م السنين
قلبى اتولد لما اهتدى
لقلوب صحابى المخلصين
فى اللحظة دى البال سرح
و بدأت اكتب غنوتى
و الفرح مد إيديه مسح
أحزانى و جدد ضحكتى
فى اللحظة دى كل الآهات
راحت خلاص بدون رجوع
و القلب طلعتله جناحات
و ما بقاش حبيس بين الضلوع
فى اللحظة دى كل الجراح
ماتت و نسيت كل الزعل
و شطبت من كل إللى راح
أيام عدت بدون أمل
عيشها بشكل تانى
ما تخدش فى بالك لو يتقال
فيك كام عيب كده و ما تبكيش
بس أعذرهم أصل جمال
زى جمالك أنت ما فيش
شافوا الورد و عابوا و قالوا
حمره خدوده و شكله مريح
طاب إيه رأيك ف إللى جمالو
نادر جدا بس صريح
إنسى كلامهم كله و خلى
شكل حياتك شىء يرضيك
أصلك مهما عملت تملى
هتلقى الناس بتعيب فيك
عيشها بطبعك، حب ملامحك
و عند كلام الناس ما تقفش
خليك واثق كده من نفسك
واجه كل الناس ماتخافش
مصرى
أنا إللى ضحى بدمه عشانك
أنا إللى ساكن جوه كيانك
أنا إللى حلمه يعلى مكانك
أنا إللى عنك قال أشعار
أنا إللى عشقك عشقه لأمه
أنا إللى حبك ماشى ف دمه
أنا إللى همك هواه همه
أنا إللى لجلك ذقت مرار
أنا إللى رافع كف إيديه
بيدعى لربه و تبكى عينيه
كل آماله رضاكى عليه
و لو فى رضاكى هتكويه نار
أنا إللى شارى لو بعتيه
تلاقيه جنبك لو عزتيه
يحارب كل الكون وحديه
و لجل عيونك إنتى إختار
يمسح دمعك فى الأحزان
يلون فجرك بالألوان
و يرسم فرحه فى كل مكان
و يحول أى ظلام لنهار
يا مصر
أنا مش مخلوق جبان ضعيف
أنا دايما رمز للأمل
كسلان يجوز، يمكن سخيف
لكن ف الجد عشقى العمل
فتشى عنى ف مرايتك
بصى فيها هتلاقينى
جوه تفصيلة ملامحك
و بين رموشك تلمحينى
فوق خدودك كنت سايب
ألف بوسه و يمكن أكتر
و فوق جبينك كنت كاتب
إنى ف حبك لازم أصبر
جوه ننك كنت ساكن
لكن غرقت ف الدموع
جريت هربت منه لكن
أجبرنى قلبى ع الرجوع
و خلانى بسمه بتترسم
على و شك أنت للحياه
عشان أخفف الألم
و تنسى بيا أى آه
حبينى زى حبى ليكى
و بلاش تسوقى ف المكابره
عشقت كل حاجه فيكى
و كرهى ليكى لحظه عابره
بوحشك؟؟
بوحشك؟؟ ما بقتش عارف
أصلى حاسس إنك أنت بتبعدينى
هخسرك؟؟ ما بقتش خايف
أصلى هلقى بعدك مية واحده تداوينى
فكرى، لو مش بحبك
ليه لقانا كان يوماتى شىء أساسى
و أسألى عليا قلبك
راح يقولك إللى داير جوه راسى
صدقى لو رد قالك
إنك إنتى كنت أجمل شىء فاضلى
و أعذريه لو مره عاتبك
و حملك ذنبى و ذنب إللى حاصلى
إعقلى و بلاش بعندك
تبدأى بينا النهاية و تكتبيها
و إفهمى لو كان يهمك
كل كلمة قالها قلبى و حسى بيها
فاكر
لما كان البحر أزرق
لما كنا صغيرين
لما كان الموج بيضحك
ليك و ليا و للسنين
لما كنا بإيدنا نبنى
ع الرمال أجمل قصور
لما كان الضحك يدوى
و يملا كل الدنيا نور
لما كنا ننام و نحلم
حلم وردى للحياه
لما كنا بإيدنا نرسم
بكره من غير أى آه
لما كات شموسنا تطلع
شقه غيم كل السحاب
لما كان غنانا يجمع
الأهالى و الصحاب
إوعى تنسى ف مره إنك
كنت طفل برىء جميل
و لو ملامحك تايه منك
نبض قلبك فيه دليل
رمضان
من طول غيابك إشتقنا
لصيام نهارك أصل إحنا
كتر المعاصى بتتعبنا
و بنلاقى فيك رحمه و غفران
فيك لمه حلوه و عباده
و الكل فرحان بزياده
أصل أنت ربيت فينا عاده
إن إحنا فيك ننسى الأحزان
الكل فيك م الخير يكبش
مسلم مسيحى ما بيهمش
على سفره واحده ما بنحسش
غير ويا بعض بكل أمان
الكل فرحان بقدومه
و بيدعو رب الكون دومه
يا رب قدرنا نصومه
و نقرا فيه كل القرآن
اذكرينى
لما تلقى الدنيا غامت
و بين شفايفك بسمه غابت
و إن الفرح لونه باهت
يبقى لازم تذكرينى
و لما تتوهى و تلقى ضلك
مش معاك عشان يدلك
حتى صوتك مش طالعلك
يبقى لازم تذكرينى
و لما تحسى إن أنتى شايفه
كل إللى أنتى منه خايفه
و بين ضلوعك شوق و لهفه
يبقى لازم تذكرينى
و لما تلقينى فى ملامحك
و دمع عينك مش مسامحك
و تشتاقيلى أداوى جرحك
يبقى أنتى بتذكرينى
ليه
هو ليه كل أما أقرب
منك أنت بتبعدينى
و إن حاولت مره أهرب
بعلو صوتك بتنادينى
و لما أقول إنى بحبك
ليه تملى تكدبينى
و يوم ما أقول إنى كرهتك
بدمع عينك توعدينى
و لما أقولك أوفى وعدك
تنسى وعدك و تخونينى
و لما أبيع من تانى ودك
بين ضلوعك تحضنينى
ليه بسامحك كل مره
و أنت دايما تظلمينى
بلاش تخلى حياتى مره
عشان بحبك صدقينى
أسباب وجيهه للأمل
وسط الهموم شمسك تغيب
و تعيش فى وسط الناس غريب
على فين تروح و منين تجيب
أسباب وجيهه للأمل
كل الطرق بقت سيان
و هتوديك نفس المكان
و إزاى طريق خلاص يبان
و كل شىء بقى محتمل
لكن أكيد مش مستحيل
تلاقى سكه تكون بديل
و تعدى منها لكون جميل
فيه كل شىء حلو أكتمل
خليك جرىء و خد قرار
و أمشى فى طريق لو حتى نار
فى نهايته هتلقى الكون عمار
دا مافيش ثواب من غير عمل
ما تاخدش فى بالك
أوعى تحط فى بالك بكره
بكره له رب يعدلها
و لو طقت فى دماغك فكره
أوعى تخاف إنك تعملها
عيش على راحتك زى ما أنت
مهما إن عاب الناس أو لامو
كبر، طنش و أشطب "لسته"
فيها صحاب بايعين أو خانو
و لو جنبك أصحاب مش لاقى
هتلقى صحاب من غير ما تدور
و بعد التوهه فى قلب شراقى
هتلقى خضار سبحان من صور
و لو كان همك حب و سابك
إنساه خالص مهما يكون
بكره تلاقى نصيبك جالك
دا زى ما قالوا ... الهوى مجنون
مبروك ع الترقيه
يا جمال أخبار الصبحيه
وياها كمان أحلى هديه
أنا عايز أهنى و أقول م الصبح
مبروك جدا ع الترقيه
و بقول و الكون كله معايا
مبروك من أمسى لبكرايا
و لبكره شويه عشان تتقال
أو توصف فرحتى جوايا
و لو على قد الفرحه هقول
يبقى أكيد كده مش معقول
أصل الكلمه دى طولت منى
و عاوزه تشق الكون بالطول
و يارب كمان كل آمالك
ربنا برضه يحققهالك
و تعيشى تملى ف أحلى حياه
و كل الأفراح يرسمهالك
شيزوفرينيا
كليك شمال
إحنا بقينا فى عصر السرعه
فيه الصدق مجرد خدعه
و فيه الحب إتحول سلعه
و راح الصبر و طولة البال
و حال الكون بقى حاجه تحير
حتى كلامنا شكله إتغير
و الإخلاص بقى عمره قصير
و الإحساس مابقاش شغال
و كل مشاعر الناس إتسدت
و الوطنيه طبعا قلت
و الحريه كمان إتهدت
و مابقاش فيه للكلمه مجال
حتى إللى أنا أخلصت فى حبه
و كنت أتمنى إنى أفضل جنبه
شالنى بسرعه قوام من قلبه
و داس على قلبى كليك شمال
شيزوفرينيا
ماليش فى الحب ولا أعرف شكله
و عندى كلام الحب ضعيف
و مهما بقول إن أنا مشتاقله
برجع تانى و أقول تخاريف
أصل أنا قلت هضيع وقتى
و أشغل بالى كمان على إيه
و أجرح قلبى و أقل فى راحتى
و لما يسبنى هقول له أنا إيه
و قلبى يقولى تعالى نروح له
أهو هنجرب يطلع إيه
فجأه لقيت إن أنا مرتاح له
و برجع تانى و أحن إليه
وقت الفرح يعدى ف ثانيه
وقت الآه بيفوت ف سنين
نفسى أفوق م الشيزوفرينيا
ادعو معايا و قولو أمين
حبر ع الورق
أنا مش هعاتبك ع إللى كان
ولا جاى أقول مين إللى خان
بس أنت شخص مالوش أمان
و كرت كوتشينه إتحرق
وعدتنى كتير بالكلام
هتكون معايا للختام
و سبتنى ف وسط الزحام
و الوعد حبر ع الورق
أنا مش زعلان إن أنت بعت
أنا بعدك أنت أكيد كسبت
حاجات كتير و لو خسرت
بكتيرو شهر إللى إتسرق
ندمان عليك.. لأ مش صحيح
دا بعدى عنك شىء مريح
و قلبى بعدك مش جريح
و مافيش فى بعدك شىء فرق
أنا و أنت
شوفنا مقاسى كتير بزياده
و شكل العنف ده أصبح عاده
يلا يا صاحبى بلاش نتمادى
أصل بلدنا دى غاليه علينا
طول أيامنا ما بينا سلام
ليه دلوقتى بدينا كلام
عن إرهاب و دمار و آلام
و عن أوضاع كات غايبه علينا
فكر فيا هفكر فيك
لو ضليت فى طريق أهديك
و يوم ما أحتاجلك أكيد هناديك
و كفايه قساوة الدنيا علينا
إيدى فى إيدك نبنى بلدنا
و تانى نرجع مجد أجدادنا
و نزرع خير فى طريق أحفادنا
و أكيد هيعود الخير دا علينا
الغربه
ع المتغرب حنى يا غربه
اللى أيامك مره و صعبه
فرحان بيكى دى أصعب كدبه
كنت بقولها لكل حبايبى
بسهر ليلك و أشكى نهارك
تايه ويا دروب مشوارك
مجروح قلبى و مكوى بنارك
و غصبن عنى لازم أخبى
و لازم أنسى همومى و ضعفى
بعيد عن أهل و حضن يدفى
لازم أكمل لازم أوفى
وعد أنا شايله جوه فى قلبى
بدعى يا رب تكون ويايا
خفف همى ولبى دعايا
و ويا أحبابى تخلى لقايا
يكون مستعجل علشان فاض بى
كدبة أبريل
بص يا صاحبى أنا عندى حكايه
و عاوز أحكيلك بس الأول
ع ال"فيس بوك" تخش معايا
و لو ما حصلش أنا زعلى يطول
و تحت الحاله تسيب تعليق
و بعدين نحكى على التفاصيل
عشان إكمنه عارفنى برىء
دبسنى فى كدبة أبريل
سمعت كلامه و قمت قوام
و ع ال"فيس بوك" فتحت حساب
و تحت الحاله كتبت كلام
فيه مبروك ليه ويا عتاب
شكرا برضه و كتر خيره
علشان فيا عمل معروف
أصل لا يمكن أنا من غيره
ع ال"فيس بوك" أروح محدوف
مبروك
خضيتنى بس برسالتك
محسسنى إنى أهملتك
و ده سبب تخاصمنى عليه
يا رب تكون دى تستاهلك
مبروك يا سيدى على الإنجاز
شقه و شبكه و بعده جهاز
و بعدين تبقى شاب مسن
مش ده إللى إسمه جواز؟
مبروك و مش بادعى عقبالى
دى حاجه ما جاتش على بالى
و لو كنت قلت إنى بحب
دى كات أوهام و فى خيالى
راضى
مهما قولنا مش هيحصل
أو نتمنى مده أطول
لازم ييجى اليوم و نرحل
و دى طبيعة الإنسان
و مهما جانى الحزن أكبر
من ما كان قلبى يصور
هقدر أنسى و أقدر أصبر
صبر أيوب ع الأحزان
و لو فارقنى حد مره
و شفت الدنيا بعده مره
و بان عليا الضعف بره
هضحك برضه للزمان
و مهما كان واجعنى ماضى
و جرحه كان مش جرح عادى
بالنصيب أنا قلبى راضى
طول ما قلبى فيه إيمان
أمى
مستحيل استغنى عنك
صعب إنى أعيش فى بعدك
ليا مين فى الدنيا بعدك
دا أنت أول حب ليا
أمى يا أول صحابى
أمى يا راحة عذابى
بتشتكى من طول غيابى
لو غيابى بس نيه
أمى يا أول علامى
بسمك أنت باديت كلامى
بتتمحى فى حضنك آلامى
و تترسم فرحه فى عينايا
أمى نور كل المطارح
أمى بستان خير و طارح
ربتينى بدون مصالح
و كل عمرك ضاع عليا
أمى أنت رضاكى غايه
و مهما هعمل مش كفايه
بادعى ربى يكون معايا
و أوفى من حقك شويه
إبدأ من جديد
صاحبى قالى خلاص مسافر
مع الحياه قررت أعافر
فى الصخر هنحت بالظوافر
عشان فى الدنيا أخذ مكانى
كلامه خلى البال سرح
فى ذكريات قلب إنجرح
و عشان يدور ع الفرح
قال هنسى ذكرى مزعلانى
لقيتنى بقوله خلاص نويت
تسيب صحاب بينهم لقيت
إخلاص و حب و ظل بيت
و مافيهومش حد كان أنانى
يا ريت تلاقى قلوب هناك
تخاف عليك و تكون معاك
و هستنى برضه يوم لقاك
و يوم ما ترجع لينا تانى
و مهما كانت بينا فرقه
مقدرش أنسى صحابى لأه
و لو فاضلى فى قلبى دقه
دى عشانهم مش عشانى
حاله
يمكن تكون كلمات و حروف
يمكن تكون أحوال و ظروف
يمكن تكون بعض الظنون
لكن سببها دا مش معروف
هتعلم دايما أقول الحق
هتعلم أقول للظالم لأ
هتعلم إنى أعيش و كأنى
ماباخفش أنا غير من خالق الخلق
هتعلم أصارح نفسى بجد
مش هاقسى بقلبى ف يوم على حد
هتعلم أكون أخ حنون
مش بس مجرد عود إتشد
هتعلم أكون أنا صاحب صوت
هتعلم أبطل أعيش ف سكوت
هتعلم دورى إكمنه ضرورى
و هتعلم أعيش أنا قبل ما أموت
بحبك
بحبك حب ماله حدود
لكن كل إللى بينا سدود
حلمت بيوم تكونى لى
و قلبك أبقى فيه موجود
عشقتك قبل ماعرف مين
يا أول حب بعد سنين
عشت فيها وحدانى
و كان فى الوحده قلبى حزين
بسحر عنيكى شغلانى
بنظرة سكنتى فى كيانى
فى بعدك أيوه بتعذب
يا أجمل حاجه وحشانى
هنسى مع إنى بتألم
عشان مش قادر أتكلم
دا أول حب لينا أكيد
لازم فى قلوبنا بيعلم
أيام
هما يومين و خلاص هتحرر
بعد ما عشت أنا عيشة البربر
وسط الصحرا و أراضى ضحله
و لبس يعر و ما فيهوش منظر
ألف وداع يا دموعى و يأسى
ما عدتش تانى أنا هسأل نفسى
هخلص إمتى عشان الجته
كات محتاجه لحاجه تنسى
همشى ف وسط بلادى أرفرف
و أقعد ويا صحابى أستظرف
مش بالأمر عشان العمر
ما بقاش ملك لواحد مقطف
يلا يا دنيا إحلوى عشانى
أصلى بقيت سلطان لزمانى
و هعمل خير ويا الغير
علشان ربى خلاص نجانى
